حلو الفن – النجم علاء زلزلي يوجه رسالة للزعماء السياسيين والمسؤولين .. كلامي مش موجه للشعب اللبناني

حسن نشار

كلامي اليوم موجه للزعما السياسيين ولزعما الأحزاب وزعما الطوائف؟؟؟؟
بما انو الشعب اللبناني اليوم عم بواجه وباء عالمي وفيروس
قاتل ممكن يحصد أرواح كتيره ؟؟ وبما انو أرواح اللبنانيين غالية وبما انو الشعب اللبناني أعطاكم كتير من حياتو ومن انتمائو المطلق ومن جيبتو ووصل معكم للتضحية بروحو وبروح عيلتو وولادو كرمال انتو تعيشوا وتكبروا وتتزعموا وتغنوا وتجمعوا أموال طائلة واملاك وسلطة ؟؟؟؟
وبما انو لليوم بعدو ماشي وراكم بالدم وبالروح …..
اجا وقت تردو الجميل ومش بالدم وبالروح لا ردو الجميل بشوي من اموالكم اجمعوا من أموالكم وادعموا وجهزو المستشفيات الحكومية ولو ما بيستوعبوا جهزو مدارس رسميه بكل المناطق والقرى اللبنانية واعزلوها واستوردو الأجهزة اللازمة وجهزوها وما تخلو شعبكم يموت عالطرقات او لإن ما في امكانيات او من القلة؟؟؟؟
اي نعم بتقدرو ومن دون ما نطلب من حدا يساعدنا؟
وبلا ما يطلع كل واحد ينظر ويرمي التهم والتقصير عالتاني
شعبنا الو حق عليكم ضحى بروحو كرمالكم مش كتير اذا ضحيتوا بأموالكم كرمالو ؟ اموالكم جمعتوها من ورا هالشعب ومن هالبلد
ومتل ما خايفين عليه وطلبتو منو يقعد بالبيت ويعزل حالو
خافوا عليه وما تخلوه يتبهدل؟؟؟
كونو وطنيين وزعما وقادة حقيقيين وانسانيين
وتأكدوا ما حدا ماخد معو شي ولا شي بيدوم الا رحمة رب العالمين اعملوا شي لأخرتكم
الشعب اللبناني بيستاهل حتى اذا بدو يموت يموت عزيز
الله يحمي كل الشعب اللبناني ويحمي لبنان من كل شر ومرض … مواطن لبناني علاء زلزلي ..
أسرة موقع “أبيض وأسود” لصاحبه بول أبو حيدر ورئيس تحريره حسن نشار وأسرة موقع “حكيلي” لصاحبه حسن نشار تشارك النجم الصديق علاء زلزلي صرخته وتتمنى له ولجميع اللبنانيين الصحة والحب والنجاح الدائم .. كما تتمنى له المزيد من التألق والتوفيق عسى أن تنتهي أيضاً هذه الأزمة قريباً