حلو الفن – يا هَالعُمر – بقلم الشاعرة ندى عيّاش صادق

قديش يا هالـعُمر مرجحنا
حبل الشقا والهجر جَرّحنا
كلما عن الديرة هَجَر محبوب
بتروح شقفة من جوارحنا

عُمر البشر “يَمي” خِلق مَحسوب
والـمَوت مَـعنا وين مـا رحـنا
بيجوز مـطمحـنا يجي بـغروب
وبيجوز صَوب الشرق مَطمحنا

وعا قدر ما نقطع دروب دروب
وتـطير بالـدُنيا جـوانـحنا
عاللوح في اسم البشر مكتوب
بالآخرة مش هون مطرحنا

نحنا وراكي شمع عم بيذوب
وعا قد ما بدُنيا الفنا سحنا
فجأة بيجينا قهرنا المحجوب
والدهر بيغيّر مـلامـحنا