تحدث المخرج محمد سامي عن حياته الشخصية وتفاصيل عن عائلته وعلاقته معهم.
وخلال لقائه مع برنامج “جمعتنا الليلة” الذي يعرض عبر قناة الظفرة وتقدمه الإعلامية مفيدة شيحة قال محمد سامي ” بناتي الاتنين معلمني الأدب، وأكاد أكون أكتر أب شخصيته ضعيفة أمام ولاده، وحشري جدا في حياتهم عشان حابب أكون ملم بكل تفاصيلهم، بنزل أشتري معاهم اللبس وأشوف مذاكرتهم، وبنتي الكبيرة واخدة شخصيتي بالمللي، وسيلين الصغيرة شبه مي شكلا وموضوعا.
وتحدث محمد سامي عن والده ووالدته، قائلا أنا تحت جزمة أمي وأبويا هما حياتي، ولما بتجيلي مشكلة مش بعيط غير في حضن أمي، هي مصدر قوتي وأول حد صدق فيا، وبحكي لها كل حاجة يمنعني كبريائي إني أقولها لغيرها، ومراتي شريكة حياتي طبعا بس مفيش راجل بيحب يبين ضعفه وانكساره قدامها.
وأشار محمد سامي إلى أن هناك علاقة قوية تجمعه بعائلته قائلا “إحنا بيوتنا ورا بعض وحياتنا كل يوم مع بعض، إحنا مش عيلة بتسأل على بعض في الأعياد بس، إحنا كل يوم مع بعض وبنحكي كل حاجة لبعض، ومي مراتي وروحها في أمي وهي بتدافع عنها لما يحصل مشكلة بينا.
وكشف محمد سامي عن الأشياء التي جذبته في زوجته قائلا “أول حاجة لفت نظري في مي هو جمالها، وعندها حياء، ومعندهاش طباع معينة وحشة في ستات، زي إنها مش حشرية ومش بتغير على كل حاجة، بتغير طبعا بس من غير ما تهزق نفسها وتزعل كل شوية، وبتعزز قيمة زعلها وكلمتها.
